كلمات اغنية عدة جروح عواد العواد 2023

ما بقى لي يوم رحتي سوى عدّة جروح

والعتب يلحق ظروفك و لا يلحقْك لوم

كنّي المسجون في ضيم و اطيوفك صروح

آتوجدّ وآتنهّت وانا كلّي هموم

من غيابك عفت نفسي و بوحي ويش ابوح

والغزل و الوصف ما فيه من غيرك لزوم

ما أقول انْ فيك روح ٍ ولي فالجوف روح

روح وحده بيننا يا عسى حبّك يدوم

في وطن حنيّة القلب والوجه الصبوح

انتي الحاكم وانا في محبّتْك امحكوم

شعرِك الغدرا و لا صار لـ امتانك وضوح

وجهك القمرا و الاعيان ساطعة النجوم

ضحكة اشفاك اركدي خايف ٍ روحي تروح

سلهمة عينك لعيني مثل حدّ السهوم

والعطِر و العود و المسك من صدرك يفوح

فارقه فالغيد حولك و فالعالم عموم

كفّتِك دايم لها فالموازين الرجوح

زين من ربّي و ما زيّنك حلْي و هدوم

خافقي متعلّقٍ بك و ما له عنْك شوح

والزمن مهما قسى فالسما ربٍ رحوم