كلمات اغنية قومٍ ليا نادا المنادي عواد العواد 2025

قدام لا اسج الركايب مع وسيعات الفجاج

وانزل بها في خايع (ن) مافيه نت ولا شبكه

ارهوا لي من اللي تدفقها من افواه الزجاج

تقول شلال (ن) ليا حول على القاع دهكه

سودا (ن) يطير ابها عماس الراس وتعدل المزاج

نفحة شذاها اطيب من الكمبود وامن المستكه

حتى لو اهلها سواد وجييهم .. ماله علاج

يابيض الله وجيههم يوم ارسلوها المملكه

ابى ابجد الارض الوعر .. واجنب القاع الزراج

ماني بسالك لي طريق (ن) كل طرقي يسلكه

وارستك افكار تواهج .. فالدجى مثل السراج

من ثقل ماطاها يجي في ساحة الشعر حركه

لو اني امن النظم في تال الزمان ابغى الخراج

لكن لا جاء واجب هل الماجوب مانيب اتركه

واجب رجال مجدهم .. لا عد مافيه احتجاج

مجد (ن) بحد السيف ماهو فبركه في فبركه

يابناء سعد تهناكم الفرحه ومبروك الزواج

فالكرنفال اللي يشرّف من مشى له وادركه

ياذخر من يمناه تبطش فالحشو قبل النعاج

كم حاشي من كرمته .. دق نحره في مبركه

امدحه واعرف منهجه مافيه ميله وانعواج

ومدحاً ما هو يسنَد على شرواه مافيه بركه

ابن شويمان ان بدت له قالةً فل الحجاج

لو يدري انه ماوراها .. الا طريق التهلكه

يقدم بفعله .. والفخر مابينه وبينه سياج

ماكره من برقا وروق اهل الفعول المربكه

يوم المحاجي مركيه والجو غاطيه العجاج

والهيج جايً له وقع والخيل جاي لها دبكه

تفاقهم يقلط على القوم اللظيه بام تاج

ويزرفل الارواح من زرفالها اللي يفلكه

قوم ليا نادا المنادي ماتعرف الانحناج

يبشر بهم من نبهم في سلم ولا معركه