كلمات اغنية احفظي قلبي فايز الدوسري 2026

الشتاء يثر على العاشق يثير اشانه

كل ليله ذكرياته تقلط وتجتاح

الظروف اللي تحده مايجي خلانه

والسهر يحرق خفوقه لين سده باح

الحطب فالنار لامن مرني دخانه

مايشابه ريحه الا عطرك الفواح

استحس الهاجس اللي حركه شيطانه

ساقني طاري هواك السارق المزاح

القصيد اليا بغيته ضامنن قيفانه

مثل ماضمن في يميني لعبة المسباح

هاجسي وسط السماء لا فرد بجنحانه

كل بيتً جزل وسمي فوق خده لاح

اطنخي تدللي يا فاتنه يا دانه

في بحور الشعر انا لعيونها سباح

قلبي اللي في ضلوعي قافلً بيبانه

خانني حامي حماه وسلم المفتاح

صار صدري مملكه وانتي لها سلطانه

كل شي ماقبلته صار معك ايباح

ايه قاسي مير لا طرو له اسم فلانه

يرجع الطفل الصغير وخاطرك مرتاح

والله اني مانسيت عيونك النعسانه

الشفايف لون توت وخدها تفاح

لك حجاجً مثل رمح الفارس بميدانه

من يصيبه فالضحايا والله انه راح

خصرها اللي ناحته ربً تعالى شانه

جسمها والله مايقدر يرسمه جراح

ناعمه وعروقها في يدينها رويانه

خظر مثل اغصان وردً رشها الفلاح

انتي اللي في التغنج والدلع فنانه

والتغنج لا اجتمع مع زينها ذباح

ثمني حب المحب اللي يجن جنانه

كل مايفقد خيالك دمع عينه طاح

حافظً حبك ولاكن ماينقص شانه

المكابر والمعاند فالغرام اشباح

احفطي قلبي تراه اليوم معك امانه

عاشقك حافظ غلاك ولاهوب مزاح

ابدويً فالحياه اسلوبي وعنوانه

سلم جدي والخشونه والصلاه سلاح

الفخر لا جا مجاله عزوتي تيجانه

عزوتي حزمان ربعي مكسب المداح

افتخر روقي حماوي لاعقد حجانه

عين حرً حقق الصيده على الملواح

الزمن ماهمني لو كشر بنيبانه

الحياه اصلن صبر ومغامره وكفاح

لي حزامً فزعته تسبق كلام لسانه

كل همً لا ذكرته فالضمير انزاح

يافهد لك سمعةً بين العرب رنانه

واضحه ماهي تبي تضخيم ولا ايضاح

حي راسً بشجاعه هامته مليانه

له فعولً تتعب الكتاب والمساح

تعرف الطيب لاشفت اهل الردى عدوانه

والكريم اللي عطا يوم العدود شحاح

لو طلب دمي عطيته قلبي بشريانه

ياعسا ايامه سرور ومفخره وافراح

قالها اللي داريً بان اللسان حصانه

ويدري ان الحر مايشهر بدون جناح