كلمات اغنية طلوع سهيل فايز العتيبي 2025

وصلك الفرج ياللي تراقب نجوم الليل

ونفسك على السجات تعطي بشايرها

تبا تبرد اجواء المملكه مع طلوع سهيل

وتسهل عليك الحاجه اللي تدورها

معك ناس واجد ضاقت صدورها بالحيل

تحرا العلوم اللي تسلي خواطرها

ليا لاح برقً مقتفيه المطر والسيل

وهب البراد وجمرة القيض بعثرها

وجونا العسوس وجو بالاخبار بالتفصيل

علوم الحيا كلاً يباها ويذكرها

بدت رحلةً ماتقبل الهون والتاجيل

والاصحاب شالت عفشها في مواترها

اخوة رجالً فالمواقف تعدل الميل

على كل حال يعود الراي لااكبرها

ولابينهم نمام والا ردي وبخيل

لهم سيرةً فالوقت ربي معطرها

لهم دور في قطع الفيافي وصفوة جيل

ولاتخلف الوجهه ليا شار شايرها

على صيد بر ودر خلفه وبن وهيل

رسومً طبيعيه بشتى مناظرها

وش احسن من البر النقي والابل والخيل

حياة ً تسر البال يوم اتذكرها

ليا جالها حنه وجاء للحصان اصهيل

وهي سارحه خلفاتها مع عشايرها

تذكرني الايات في محكم التنزيل

ياسبحان خلاقً خلقها وصورها

يباري لها عودً معه برنو ودربيل

ويمشي لها في شفها مايحيرها

يجوب الديار رضاً لها كل وقت محيل

تقول انه بكل المواقع يخيرها

زهور النبات اطيب من الورد والاكليل

ثلاثين نوع يعد ويسمي اكثرها

هذا والله الابداع والفن والتكميل

صحيح العلوم اللي تجي من مصادرها

بعيدً عن ازعاج الخواطر وقال وقيل

على شف بالي والوناسه من اخرها