كلمات اغنية الحقيقه واضحه فهد بن فصلا 2025

 الحقيقه واضحه

الهجوس الراقيه كنها مدرج مطار

تقلع الافكار ويقودها طيارها

ما اختلط عج الاصايل ولا ثار الغبار

يامغني غن الابيات ولا جارها

اصنع لنفسك طرق وارفع ل رايك شعار

انت لك نظره وللعالمين انظارها

خل في عزمك جلاده وفي راسك شنار

لاتزودها ولاتنقص بمعيارها

وانتبه لاصار رجال م الثاني يغار

هذي والله حاجةٍ ما لقيت اعذارها

لحيةٍ ماهي تفيّيّ ولا فيها وقار

ماهي بندٍّ ل روس العرب وكبارها

والردي لو بار ما هو غريب ان كان بار

ما تردا غير في نفسه ومقدارها

لو لبس مشلح وبين الشيوخ اقبل وسار

مايقدّم فالرجاجيل غير خيارها

الشيوخ لها مكانه وحشمة واعتبار

ما ينقص قدرها من يجيب اخبارها

وشيخ قحطانً ليا جاء المهمات الكبار

يجعل بعرفه كبار الامور صغارها

ورثه شدادً مورث من جدودً كثار

يوم بقعاء بالكباره تزيد اخطارها

من عصر شايع وفرحان ماهي من نهار

ثبتوها بالدليل وعلينا عارها

لا رحل شباب نارًا يجي شباب نار

خلو اهل الحقد عنها تموت بنارها

شيخةً ما جات وهبه ولا جات بقرار

ايدوها ملوكنا واكملو مشوارها

والله ماهي عنصريه ولاهي بحتقار

نعمة الله حمدها حق واستشعارها

والحقيقه واضحه كنها شمس النهار

ما تغطيها السوالف ولا ثرثارها

حكمة ابن دليم صيت مع الركبان سار

قد طغت كل المواقع وكل اخبارها