كلمات اغنية حنين الشوق مانع ال سالم 2025

داعبتني نسمة الذعاع فاليل وظلامه

وكتسى صدري حنين الشوق من مده قصيره

بين لحضات الغرام وبين ذكرى لنهزامه

في عيون الي عيونه كنها سيوف(ن) شطيره

حركت بي نسمة الذعاع فيضً من عدامه

ساقت الاشجان في قلبي مثل سوق المسيره

كن نسانيس الهوا ترسم على قلبي علامه

للحبيب الي عشقته والمشاعر له كبيره

ماخبر مثله عشقت ولا تطيرت بغرامه

وماخبر مثله لقيت ولو ادوّر بالف ديره

عنقه الي من جماله فيه ركزه وستقامه

وخده الي كنّه الورده ونفحه من عبيره

وصوته الي لا سمعته ما اركز في كلامه

ضعت في بحة حروفه وصارت احوالي خطيره

والله اني لجل ذيك العين ولا لبتسامه

بعت كل الناس حتى اللي معي كنت استشيره

ما ابي غير الوليف الي معه فالنحر شامه

مستعد ابيع روحي له وخليها اسيره

ياحبيبي ويش عمري قبل اعرفك يا غمامه

اسقت الخاطر بعد كانت حياتي في دميره

جيتك لي كنها عيدن بعد شهراً صيامه

طال مدّه والعرب بعد العنا جاهم سفيره

ذي حروفي لك عسى قلبك يرغد بالسلامه

وجعل عمرك ياحبيب الروح مايقطع مسيره