كلمات اغنية ميثاق قلب مسعود بن شعفول 2024

تقدّمـي … واخذي من القلب ميثاق

واخذيه كلّه … كلّه اصلاً حلالك

اللي جذبني فيك يابنت … الاخلاق

واستغفر الله … والله انه جمالك

وقّفت لك كل المشاعر على ساق

ووقّفتي الدنيا … على كيف حالك

حالي بعد شفتك … على طول مشتاق

حتى لو انك ماقطعتي وصالك

أشواق في قربك وفي بعدك اشواق

متفنّـنه … في طلّتك و انعزالك

من ذاق وصلك ماتكدّر … ولا ضاق

وش عاد من هو ساكنٍ في خيالك

مثلك خلق … لـ مشابك يدين و عناق

افتاء عاشق … ماهو افتاء مالك

جوّي و جوّك و البلد جوّها راق

مهدّت لك الاجواء و الدرب سالك

انتي ملكتي زين يا فاتنه … فاق

زين كليوبترا … وصرتي لحالك

ذا وجه ولاّ شمس في ساعة اشراق ؟

وذا شعر ولاّ ليل مظلم وحالك ؟

وذي حاجبين وكحل ورموش واحداق

أو جيش ابن مسلم بـ فتح الممالك ؟

وذا خصرك اللي لو لبس خاتمك لاق

أو حال من ذاق العنا و المهالك ؟

انا كتبت ابيات شعري … من اعماق

قلبي … وشعري ماكتبته سوى لك

واليوم يهدونه … لـ عشّاق عشّاق

وكم من علاقة عوّدت من خلالك