كلمات اغنية بن متعب مسفر السندوانة 2025

لي ايام ماهدا صداعي ولا هديت

من الخاطر اللي يوم تكثر تفاكيره

مسكت الطريق المستوي لين معه ادويت

وفهقت الشماغ وثوبي ارخيت ازاريره

وتذكرت طاري طيب له مقام وصيت

محله تزاحم به مواتر خطاطيره

اسوق السلام لطيب الراس مازليت

على مسلم اسوق القصيد و تعابيره

من عيال همدان العوامر الى عديت

هل المجد واهل الفعل والعز والسيره

راعي مجلس من يوم تقبل عليه اوحيت

تراحيبه اللي ماتقاطع مساييره

قنا خيرة زمول الجزيره على ماريت

ومنحها النشاما كل عام كثر خيره

ياكم عزبة فيها زمول لها تثبيت

لهم دونها وقفه ولفه وتدويره

لوانه يولى شركة النفط ولا الزيت

بيفني دخلها مثل ماافنا مقاهيره

ذبايحه ل الضيفان واللي ترود البيت

وعلى العود الارزق راحت اكثر مخاسيره

كسبت المديح وكل طيبً عليه ارهيت

كسبته ياابن متعب بشتى معاييره

حاكيتك وقلت ابشر ما ماطلت بي وابطيت

ولا قلت خله لين تكثر معاشيره

منحته لوانه منتج وجدت به واصخيت

بناته تبيع كل ماحط تسعيره

تقدم لشوط الرمز وتحطم التوقيت

وتهدي التهاني للشعار وجماهيره

تجملت قدام المعرفه معي واوفيت

وذي عادة الطيب ماتكثر معاذيره