كلمات اغنية سنين العمر نياف تركي 2024

يـا ســدرةٍ من ثمـار النبـق مـليــانـه

ومـع ذا عصٌافيرهــا لجّـت لجايجهـا

في زحمٌـة الوقت كـل الناس بلشانـه

كـلٍ يـونّ ويقــول اللـه يفــرّجـهــا

اليــوم ضـاع الهـدوء وضـاع عنوانـه

يصعب على الناس تسمع من يهرجها

نـاسٍ تهــلّ الدمـوع ونـاس فرحانـه

احـدٍ هذب صهـوتـه واحدٍ يدرّجـهـا

تشوف عند الغديـر النـاس عـطشـانه

ووسط المشـافي تطـالب من يعالجها

اللـه على مـا مضى والنـاس رضيـانـه

مـا احلى حياة الرضا ما احلى برامجها

فـي وادي فليـج فـي روضه وجيـلانـه

في محتـوى الذكـريات وفي مباهجهـا

يوم انّ ما نسمع الا الطيـر والحــانـه

وكدرّيتـه راسمـه بارضـه مـدارجهــا

والنجـر يجذب جميـل الصوت جيرانه

والارنب اللـي غريـم الصيـد نفـّجـهــا

اقفـت ركايب سنين العمـر واشجـانه

ولا عـاد يجـذب هوى نفسي حوايجها

ودعيـت ربي عظيـم الشـان سبحـانه

عـالم خفيّ الصدور ومـا يخالـجـهــا

يختـم لنـا العمـر في تجــويـد قـرآنـه

نمضـي على السـنـّه ونحفظ مناهجها